ياعيال دوكم لحيتي كلها شيب(قصه + قصيدهـ)

" الاداره" الدوله :

قال هذه قصيدته المرثية في عياله حيث أنه دعاء عليهم وستجاب الله دعوته وما جالهم عيال وقيل إنهم تزوجوا مرة ومرتين وثلاث بس كان أمر الله قد نفذ ونقطعة من ذاك الوقت وما جالهم عيال وبدأت القصة يوم ماتت أمهم وتوهم صغار وقام والدهم جحيش بتربيتهم ورعايتهم ألين ما كبروا وقوى عودهم وكان لهم مثل ألام والأب يسهر الليالي على راحتهم ورعايتهم وفي النهار يسعى على شان يجلب لهم الزاد وكان في ذاك الوقت من الصعب الحصول على الطعام ألا بشق الأنفس فكان يترك عياله عند خوالهم أو الجيران وعند الأكل كان يحرم نفسه نصيبه أن كان الزاد شوي ويكتفي بشربه ماء وينام وهو جائع ومن حرصه على عياله أنه ما تزوج بعد أمهم لأنه خايف أنه تكون قاسيه عليهم وتكفل بالحنان والتربية لهم ومرت السنين والسنين وزوج العيال واحد ورأى الثاني وبعد كل إلي سواه لهم ما لقاء من عياله إلا الجحود والنقص بمعاملتهم له ولا عاد احد منهم يبي يخدمه أو يقضي له لزومه بعد ما حل عليه الشيب وكل هذا علشان زوجاتهم إلي أصبحن يتوذن من خدمته حتى كل واحد منهم صار يطرده من بيته ويصك الباب من دونه يوم شاف ها لطريقه وما جاء منهم قال ألقصيده المشهورة وبعدها راح يسكن بأحد الخربات ولا عاد يقوى على ألقومه والمشي وضعف سمعه وشوفه حتى توفاه الله . أن لله وأن إليه راجعون حسبنا الله والنعم الوكيل هذا جزاء الوالدين وهل هذا ما أمر الله ورسوله به لخدمه الوالدين ..؟

قال الذي يقرا بليا مكاتيب. . . . .ياللي تقرون العمى من عماكم
ياعيالي اللي تشرفون المراقيب. . . . .تريضوا لي واقصروا في خطاكم
خذوا كلام الصدق ما به تكاذيب. . . . .مثل السند مضمون للي وراكم
ياعيال لا صرتوا ضيوف ومعازيب. . . . .ترى الكلام الزين ملحة قراكم
وتروا السبابة من كبار العذاريب. . . . .وهرج البلايس ما يطول لحاكم
المذهب الطيب فهو مذهب الطيب. . . . .والمذهب الخايب يبور نساكم
ياعيال ما سرحتكم باللواهيب. . . . .ياعيال ما عمر المعزب ولاكم
ياعيال ماضربتكم بالمشاعيب. . . . .ولا سمعوا الجيران لجة بكاكم
ياما توليت القبايل تقل ذيب. . . . .من خوف لاينقص عليكم عشاكم
وياما شربت السمن من عرض ماجيب. . . . .يـــفــز قــلبي يوم يبكي حداكم
أحفيت رجليني بحامي اللواهيب. . . . .وخليت لحم الريم يخالط عشاكم
ياعيال دوكم لحيتي كلها شيب. . . . .هذا زمان قعودنا في ذراكم
قمت اتوكا فوق عوج المصاليب. . . . .قصرت خطانا يوم طالت خطاكم
عطوني القرضة عليكم مطاليب. . . . .عطوني القرضة جزى من جزاكم
لابد يوم عاوي دوني الذيب. . . . .بالقبر ما افرق طيبكم من رداكم
ماني بفاضحكم بوسط الاجانيب. . . . .باعمالكم يدرون كل اقرباكم
لوكان تدرون الردى والمعاييب. . . . .صرتوا مع المخلوق مثل خوياكم
خوالكم بالطيب تروي المغاليب. . . . .ولو تتبعون الجد محدن شناكم
وش علمكم يا تاركين المواجيب. . . . .حسبي عليكم هالردى وين جاكم
قصيتكم واسندت وادي سلاحيب*. . . . .ولقيت بالصبخا مدافيق ماكم
ياعيال بعتوني (بصفر العراقيب)*. . . . .ما هي حقيقة سود الله قراكم
يالله عسى اعماركم شمسها تغيب. . . . .يعتم قمركم ثم تظلم سماكم
يا علكم في حاميات اللواهيب. . . . .ياللي على الوالد خبيث لغاكم
شفت الجفا والحيف والغلب والريب. . . . .بضلوعكم لابيض الله قراكم
عسى نساكم ما تحمل ولا تجيب. . . . .ولا حدن من البزران يمشي وراكم
اخسوا خسيتوا يا كبار اللغابيب. . . . .اهبوا هبيتوا يقطع الله نماكم

صفر العراقيب : النساء زوجات أولاده
وادي سلاحيب: وادي بين الأردن والسعودية

جحيـش الـسرحـانـي العـنزي

ياعيال دوكم لحيتي كلها شيب(قصه + قصيدهـ) C0n77472

ياعيال دوكم لحيتي كلها شيب(قصه + قصيدهـ) C0n77472

منقوووول