انا ما أخطيت في حقك ولكن الكلام عتاب
أعاتب والعتب كلمة تفسرها معانيها
أعاتب واحسب بهرجي إلا مني حكيت حساب
وكلمه يستحي منها لساني يبتدى فيها
وإذا أنت من العتب وتزعل علينا وبتصك الباب
ترى مانيب قاصدها ... ولاني فيك ناويها
ولا ودي على الفرقا وقلبي داخلي مرتاب
أشوف إن الهوى خدعة وأشوف القلب راضيها
وأشوف إن الهوى فرقا مواليف وعناد أحباب
وأشوف إن الجفا خطوة ولاني قادر أخطيها
وقلبي لو عشق يخلص ولو طالت عليه رقاب
وتشهد له دروب الحب حاضرها وماضيها
عشقنا والهوى حسرة ، مشينا والأمل كذاب
بـديـنـــا نـبـنـي مـنـهـا قـلـيـل مـن بـلاويـهــــا
عرفت الحب من عمري صغير بالغرام وشاب
وقلبي للحبيب اكبر من الدنيا وما فيها
صحيح إني نويت ابعد ولكن الهوى غلاب
وهي رحلة بديت بها ولا ادري كيف بنهيها
تحريتك شروق الشمس وشفتك للشروق غياب
ولا أضنك تبيع العشرة اللي كنت شاريها
بقى لي بالهوى نظرة وتغريبة ودمع أهداب
وقصة بترك لسانك على العذال يرويها
وأناجي باقي حروفي وبألف للفراق كتاب
قصايد تملي أوراقي ارددها وأغنيها
وإذا مرتني الذكرى وجرحي بالحشا ما طاب
بتبعدني وتدنيني وببعدها وأبدنيها
وأنا عيب علي اشكي من الدنيا بدون أسباب
مدامي ما خذ منها يجيني يوم وأعطيها
لطلال الرشيد
